校監出事累家長 學券計劃誤幼苗

大家仲記唔記得，○九年教育界爆出一單醜聞？基督教臻美黃乾亨小學暨初中學校前校監梁淑貞，涉嫌詐騙同盜取學生家長共五十五萬元，早前被捕歸案，單案仲審緊。

太一叮舊事重提，係因為教育局公布最新一期幼稚園概覽，同樣由梁淑貞任校監嘅基督教臻美秀華幼稚園，被稅局剔出慈善機構名單，能否以非牟利性質營辦變成疑問。呢次唔知算唔算係一人出事，株連九族呢？

嗱嗱嗱，城門失火，殃及池魚，臻美失去「非牟利」招牌，唔止校方頭痕，家長亦受連累，事關幼稚園喺今年八月十七日後取錄嘅新生，可能再冇資格享用學券。家長每年一萬六千元學費津貼，有機會付諸流水，荷包大出血，唔肉赤就假！

負擔唔起高昂學費嘅父母仲慘，被迫要安排子女轉校。頻撲事小，萬一搵唔到好學校，呢筆帳都唔知搵邊個算。話時話，校監涉嫌犯錯，幼稚園被當局打手板，唔係唔啱，但係要家長一齊受罰，好唔公平啫。唔通以後報讀幼稚園，家長要查埋校監、校長有冇穿櫃桶底？

歸根究柢，家長無辜受到拖累，都係港府學券制種下嘅禍根。試諗諗，如果港府肯行多一步，實行十五年免費教育，而唔係一味形式主義搞學券制，就算校方管理層幾唔生性，家長都唔使咁徬徨啦！其實，有人計過數，即使港府為全港幼稚園提供免費教育，每年只不過多花幾億元之嘛，對坐擁金山銀山嘅港府嚟講根本係九牛一毛，但就可以免除家長嘅後顧之憂，點解咁都唔肯做呢？

事實上，港府硬銷學券制時，聲稱有助提升幼兒教學質素喎，呢種想法根本太傻太天真。教學團體指出，由於學券計劃取締咗幼師薪級表，老師加薪待遇不足，令幼稚園紛紛流失人才。更大鑊嘅係，學券制錢隨學生走，搞到有啲私立幼稚園唔止流失教師，仲流失埋學生，財政慘被陰乾，淪為「雙失」幼稚園。教育界怨聲載道，學校自顧不暇，試問又點樣締造優良教學環境？

人哋話三歲定八十，學券制○七年出台時已經先天不足，紕漏多多。四年過去，批評之聲依然不絕於耳，再勉強搞落去，盞誤人子弟咋。計太一叮話齋，港府若然真係有心改善幼兒教育嘅話，就應該推行十五年免費教育，澳門早就行緊，點解香港做唔到先？叮！