政壇：搞搞政：葉劉話競爭法管唔到領匯

立法會正在討論競爭法條例嘅草案，尋日委員會開會時，議員嘅關注點都係呢條法例可唔可以趕絕一啲霸道嘅商業行為，新民黨主席葉劉淑儀提出，領匯幾乎壟斷天水圍嘅街市，質疑競爭法未必可以解決呢啲濫用市場優勢嘅行為，領匯喺屋邨商場嘅管理手法上惡行昭彰，葉劉今次不惜點名數領匯，唔通佢都睇唔過眼？

立法會競爭法草案委員會尋日開會，葉劉直言，領匯依家幾乎壟斷天水圍嘅街市經營權，質疑競爭法立法後嘅管轄力，商務及經濟發展局副秘書長黎蕙明回應時只係話，未有實質數據，又話法例都唔能夠解決所有市場供求問題，似乎暗示領匯呢類優勢將來都會存在。

經濟動力召集人林健鋒擔心競爭法會引起不必要嘅訴訟，以及增加中小企營商成本，要求政府在法例一旦通過後，計算中小企增加的營商成本。白鴿黨主席何俊仁就認為，只要法例符合社會目標，企業實行時都要付出。