政壇：新立會指示牌混淆不清

位於添馬艦嘅立法會新大樓今日正式啟用，尋日所見，富麗堂皇嘅大樓卻有唔少問題，如廁所指示牌不清，到底指人去廁所定去開會都矇查查，而且升降機同廁所嘅標誌十分相似，搞錯都唔出奇，立法會秘書長吳文華（Pauline）尋日都承認，唔少地方都需要執漏，譬如新大樓地板唔夠平坦，容易絆倒人，都需要盡快搞掂。

新大樓咁多問題已經係不爭嘅事實，講嚟講去都同政府高層要求死趕爛趕工程有關，結果搞到處處不討好，工人鬧完到議員鬧，依家又輪到好多使用者發覺問題多籮籮。

雖然係咁，近十年來背負新大樓工程嘅立法會秘書長吳文華都話，見到大樓啟用，有如釋重負嘅感覺。尋日Pauline繼續為新大樓做裝潢工作，喺會議廳前廳門口同職員討論植物嘅擺位，原來佢希望新大樓有啲生氣，所以訂咗十盆蕉葉放喺唔同地方，點知啲蕉葉生得太高，唔啱佢心水，所以要再諗諗計。