政壇：煲呔曾陰招避民憤

煲呔曾今日發表任內最後一份《施政報告》，行政署卻喺尋日公告各方，下個禮拜日、即十六日起位於中環嘅政府總部就唔再接受市民舉行活動，即係鐵欄不再為示威團體而開，示威團體只可以搬去添馬艦新政府總部。呢份通告由發出到生效期都好趕，似乎為報告面世度身訂造，唔通煲呔曾心虛、驚住報告會惹嚟新一輪民憤？為免日日有示威，所以提早出招將示威噪音趕去海邊嘅半入伙政府總部好過！

行政署尋日公布，由下周日起，喺星期日或公眾假期開放畀公眾舉行公眾活動（其實係示威遊行終點嘅抗議活動）嘅下亞厘畢道中區政府合署中心範圍，唔再開放，而添馬艦嘅東翼前地就會代替上址，市民申請亦同以前一樣。佢哋解釋既然新總部已經搬咗，公眾活動安排亦應有所改變。

遠離禮賓府 殺傷力減弱

不過，每年十月施政報告發表後，都係團體舉辦遊行、抗議嘅高峰期，隊伍去到中環嘅政府總部，嗌口號嘅話都可以聲達禮賓府，但改去新總部，喺禮賓府嘅煲呔曾就可以耳根清淨喇，事關位處金鐘海邊嘅新總部及前往總部嘅遊行路線迂迴曲折，途人好少，對政府嘅殺傷力都低好多。我哋尋日向行政署查詢往年十月有幾多市民活動嘅數字，佢哋竟然話尋日無法提供，香港都畀人叫示威之都喇，為政者咪以為出死橋就可以避難至得o架。

講到施政報告，政府今年又出奸招，特首辦今次打破過往高官喺施政報告前夕封口嘅傳統，改為安排官員接受指定傳媒專訪，自吹自擂大數歷年來煲呔曾管治下各範疇落實嘅成效，以發放正面訊息，而新聞處就協助制訂「欽點」獲專訪的傳媒名單，包括幾間電子傳媒同指定嘅兩份少有批評政府政策嘅報章，呢套親疏有別嘅手法早已惹起媒體公憤，但特首辦卻專門為之，唔知呢啲屎橋係咪上任只得一星期嘅特首辦主任梁卓偉嘅傑作呢？如果唔係就千祈唔好學呀！