港鐵職員放生賴皮客

【本報訊】網上昨日流傳一段賴皮女乘客鬥贏港鐵查票員的片段，引起網民熱烈討論。片中兩女一男港鐵職員在列車上要求中年女乘客出示車票，遭多番拒絕及聲稱「唔知你搞乜」，港鐵職員一度出手拉扯女乘客的背囊圖將她帶離車廂，但女乘客仍「賴死唔走」，結果三名港鐵職員無奈下放生該名懷疑逃票女乘客。有網民質疑港鐵職員使用暴力，但亦有人撐他們的做法合理，「個個咁賴數仲成世界？」

該段短片昨日上載到分享網站YouTube，片段在港鐵東涌線列車上拍攝，片中身穿制服的港鐵男職員，站在一名中年女乘客前面，不斷催促對方出示車票，但中年婦支吾以對拒絕出示車票。

喃喃自語拒查票

未幾再出現兩名便衣女職員，趨前要求女乘客先下車檢查車票，其中一名穿格仔恤衫的職員輕拍女乘客手臂，並說「呢位女士，出出嚟先啦！唔係我哋報警o架！」

但女乘客堅持不肯離開，喃喃自語「我唔出呀，我趕時間，無得出呀，警察嚟都唔出嚟呀！」男、女職員又先後出手拉扯她的背囊，女乘客用手擋格並自稱「我用咗啲乜嘢（車票）都唔知呀依家」。