熱帶語林：衰仔愛煲呔

邪牌愛差人，老鼠愛大米，衰仔愛哪誰？睥睨當世無出其右，衰仔一定愛死了煲呔！

以煲呔曾蔭權為首的特區政府，殫精竭慮將香港打造成非一般的衰仔樂園。這麼一個樂園，價值撳扁搓圓，且聽一眾把「蔭權福音」視作神諭的衰仔心聲──

衰仔一號：曾蔭權話呀，自己民望由高位七十幾分不斷下滑，跌至仲有四十幾分，已經相當唔錯。我讀書成績不斷退步，次次考試都肥佬，得分低於五十合格線，有乜唔妥先？我既然已經相當唔錯，你冇理由要求我勤力用功啫，更加冇理由阻我逃學躝街。你可以鬧我係衰仔，不過你唔可以踢我出校！

衰仔二號：曾蔭權話呀，林瑞麟係經驗豐富嘅人才，所以有資格升任政務司司長。我同樣係一個極度不受歡迎人物，同學仔冇一個鍾意我，踢波如果落雨我甚至會認定「連個天都唔鍾意我」，照咁講，我點解唔可以做班長先？我同林公公最相似之處係講說話重重複複，聽我講多次，我同林公公最相似之處係講說話重重複複，你因為我「眾望所低」而唔准我做班長係狗屁不通囉！

衰仔三號：曾蔭權話呀，已根據《基本法》向中央人民政府建議免除唐英年嘅司長職務，同時讚佢協助應對社會民生不同範疇嘅挑戰，表現卓越。既然乏善足陳都可以被形容為表現卓越，咁我同樣係終日游手好閒吊吊揈，點解唔可以退學之後申請做校長先？嗱，你唔好攞我同隔籬班女同學亂搞N角關係而阻頭阻勢呀，雖然我有感情缺失，不過唔代表我冇資格做校長。千祈唔好唔記得，我伯爺同所有校董會元老都好熟o架！

如此這般，曾蔭權的存在讓普天之下所有衰仔都樂透了，樂得理直氣壯把成績表評級當作垃圾。