刺客刀襲將軍澳 隱瞞案情害死人

唔好以為恐怖襲擊只係發生喺伊拉克或者阿富汗，其實香港隨時都有可能出現。嗱嗱嗱，人煙密集嘅新市鎮將軍澳驚現口罩刀客，十小時內先後喺四個地點，以利刀從後刺傷四名途人。受害人分別背部、手臂同埋腹部中刀，浴血送院。據講狂徒窮兇極惡，行兇時仲連聲呼喊：「插死你！插死你！」呢啲手法，同恐怖分子冇分別啫。

恐怖血案首先發生喺上星期日夜晚，即係本月二號，案發到依家過咗一周，警方居然束手無策，狂徒仍舊逍遙法外。而最最最離譜嘅係，血案關乎人命安全，警方事後非但無公布案情，連提醒吓市民都冇，以致不少將軍澳居民被蒙在鼓裏，令佢哋毫無防範意識。警方咁搞法隨時害死人，萬一再有無辜市民遭襲擊，邊個負得起責任呀？叮！

難怪將軍澳居民嬲到震，連同區議員分別前往將軍澳警署同埋灣仔警察總部遞信，抗議警方隱瞞案情，要求盡快緝兇。佢哋嘅要求合情合理，事關狂徒一日未落網，居民就一日都活在刀口惶恐中！

話時話，政府自詡香港係安全都市，點解狂徒膽敢一夜行兇四次，明剃警方眼眉呢？事實上，先排旺角、銅鑼灣等行人如鯽嘅鬧市，日光日白就先後多次發生狂徒從高空擲鏹水彈落街灼傷途人事故，最初警方係威係勢，又係案情重組，又加派人手巡邏，到頭來白忙一場，連狂徒條毛都搵唔到！甚至有警方高層明言，有啲案永遠都破唔到，出師未捷先認輸，呢啲咪就係滅自己威風，長狂徒氣燄囉。老虎唔發威，梗係被人當病貓，狂徒肆無忌憚，無非欺負警方無能。

講開又講，香港目前有警察三萬多人，係公務員人數最多嘅一支隊伍。按每十萬人擁有警察人數嘅比例，遠高於美國、歐盟、新加坡同中國內地。可惜嘅係，咁嘅警力最叻就係搞「保安核心區」，保護北大人就叻到加零一，連烏蠅都飛唔入，但係保護市民嘅安全就冇心又冇力，藉口永遠係警力不足，叮！

警方緝兇不力，原因係一哥無能，而一哥無能，源於佢嘅老頂港府最高層無能。夕陽政府時日無多，高官個個抱定得過且過、夠鐘走人嘅末日心態，所謂奮鬥至最後一分一秒，實情係胡混至最後一分一秒至真。狂徒睇穿港府嘅軟肋，梗係有恃無恐。計太一叮話齋，如果警方仲唔快快破案拉人，狂徒勢必變本加厲，上次掟鏹水彈，今次攞刀捅，難保下一次唔係掟炸彈o架喇！