SUN熱辣：裝心臟去纖顫器 教局卸責學校

教育局今年向學校發出的《香港學校體育學習領域安全指引》中，建議全港中、小學在校內安裝「自動體外心臟去纖顫器」（簡稱AED），惟儀器需自費購買，部分學校無法負擔，一旦遇上學生或教職員心臟病發，隨時失去搶救的黃金機會。教育界人士批評教育局「有指引，無配套」，沒有向學校提供資助及配套，又沒有安排教師接受使用AED課程，只將責任推卸，做法完全不負責任。

現時全港已安裝AED的學校數目不多。根據香港心臟專科學院的最新數字，截至去年二月，全港只有一間小學和五間中學已裝置AED。到今年八月底，教育局向全港中、小學發出《香港學校體育學習領域安全指引》，加入多項新指引，包括建議學校在急救物品項目上，額外設置AED。

現時每部AED售價需要至少數萬元。鮮魚行學校校長梁紀昌坦言，在沒有額外撥款資助下，學校根本無能力購買。「我哋學校邊負擔得起？沙士嗰時要買口罩、探熱工具、消毒啫喱，教育局都額外畀咗三千蚊學校，但今次咩都冇！」

教師上急救課 人數多難應付

雖然教育局每年會按學校的班額及學生人數，發放不同金額的津貼。但梁校長表示，由於學校需應付各項經常和非經常性開支，儲備已不足夠，「我哋學校得七班，一共二百零五個學生，每年有四十萬元津貼，但支付水費、電費及學生活動嘅雜項後，所餘無幾，想買部機都買唔到。」梁校長希望教育局不要抱住「你自己諗掂佢」心態，在訂定指引時，也要提供津貼。

另外，使用AED的人士，必須完成一個六小時的急救課程。津貼小學議會主席張勇邦批評教育局考慮欠周全，「買儀器唔係咁簡單，仲有好多嘢要配合，好似老師要請假去上堂，同埋究竟要派幾多位老師去學習呢？我哋會員有成四百三十間，就算一間派一位老師，都有四百三十位，啲培訓機構又係咪應付得嚟？」張續說，教育局應與提供相關課程的機構溝通，並安排教師在長假期期間上課，「教育局出得個指引都係想學校跟住做啫，但依家好似拋咗個波畀學校咁！」

立法會議員王國興批評教育局做法不負責任，「依家好似要學校自己去搵錢咁，有新指引梗係要畀新資助。每間學校都有自己恒常嘅開支，突然加咗樣嘢，會失咗預算。」他認為教育局應為學校提供額外資源，用作購買AED及培訓。

教育局發言人則表示，學校可因應校本需要和年度預算，決定各項支出的優次，當局不會額外向學校發放津貼或撥款，協助購買AED。