SUN世代：拚出自家事業 改寫搵工模式

敢想敢做，令鄭裕恆（Kent）活出一條精彩的創業路。嘗過最辛苦的暑期工，Kent比別人更早學懂「努力才能改變生活」的道理，在他眼中，每個機會都是黃金。由做兼職、實習、打工，到創業做老闆，Kent一直默默耕耘，不介意辛勞、低薪。人生路一直走來，他努力砌拼自己的事業版圖，將想法逐一付諸實行，更抱着幫人的信念，建立全球首創的搵工網，希望用最短的時間，最低的成本，幫人搵份好工。

作為80後的Kent，外表年輕，但思想成熟，說話「老積」，看得出是個有歷練的人。初中時代，電腦剛流行，因為「好奇」，Kent跑到IT公司叩門，終獲暑期工的機會。明知山有虎，偏向虎山行，Kent就是愛接受磨練，「喺美國讀書嗰時做兼職，幫人洗車，朝早八點做到夜晚六點，lunchtime（午餐）得十五分鐘食個漢堡包，係好辛苦，但我就係想知有幾辛苦，唔試又點知呢？」

實習苦差當係寶

捱得苦，Kent為人還很樂觀。在他身上，任何事都會變得正面。在美國完成學業後，Kent獲得美國迪士尼消費產品部的實習機會，別人認為是「苦差」的影印工作，他卻當是「寶」。「有同事成日投訴影印好悶，但其實嗰百幾頁入面有好多嘢學，好似講吓迪士尼卡通人物嘅版權費、點樣宣傳、做廣告之類，只要用心睇吓，就可以知道一盤生意點做。」

不過，讀金融出身的Kent不甘安於現狀，始終想有自己的生意。於是，在美高梅影城打過一年工後，○七年，他在美國創立電子商品公司，一嘗當老闆的滋味。○八年，他看準具發展潛力的內地經濟，決定回流返港。「返到嚟，發覺香港嘅招聘模式好落後，經常出現錯配。搵工係好重要嘅moment（時刻），每個人都需要工作，所以就諗咗「GoHour」出嚟。」

有別於傳統的求職網，除職位、工作性質外，求職者在「GoHour」搵工網可以獲取工作地點和上班時間的資訊，「好多人去到見工，先知份工返幾點，係咪要跨區做嘢，好嘥時間！」Kent的細心，令一眾求職者更快、更準確地找到適合自己的工作；而招聘廣告收費是按申請數量計算，為全球首創的搵工模式。「自己都做得好開心，因為一直好想可以一邊做生意，一邊幫人。」

Kent想法多多，心中更有無數的創業大計：「微博、團購雖然成功，但人哋會覺得係嚟自外國，唔係原創。我希望可以創立由投資、意念、到發展，一間真正屬於香港人嘅IT公司。」

Kent's Profile

現職：GoHour搵工網行政總裁

學歷：南加州大學金融系學士

興趣：打籃球、做義工