政壇：過來人龔耀輝 教唐唐撲火
上個禮拜，唐唐公開承認有婚外情後，繼續側側膊唔講同邊位女士有感情「缺失」，又唔交代有冇私生子。同樣試過傳緋聞、搭上女主播林燕玲嘅會計師Ronald龔耀輝，尋日被問點睇唐唐處理危機時，佢以過來人身份點評唐唐手法，佢話唐唐被爆有婚外情後，即刻拖埋老婆出嚟「撲火」，但唐唐講得唔清唔楚，留低尾巴畀人估估吓，只會繼續有餘波，而且唐唐身為公眾人物，最緊要係坦白，呢鋪冇得唔認錯。
○八年參加立法會會計界選舉嘅Ronald，近排再次活躍會計界，佢同盧華基、鄭中正等一班會計師，成立咗個「一人一票選會長」嘅組織，佢哋嘅要求好簡單，就係一人一票選會長。
