政壇：搞搞政：蘇錦樑冬眠養民望？

日前港大最新一份民調結果指出，受訪市民反對煲呔曾出任特首嘅比率，升至佢任內歷史新高，仲跌入「表現拙劣」官員類別，而新上任嘅政務司司長「林公公」林瑞麟嘅評分只得三十八點五分，係有史以來政務司司長中最低分嘅一個。

商務及經濟發展局局長蘇錦樑尋日出席一個活動時，被問到點睇高官民望低，佢冇正面回應。奇就奇在民調同時發現佢嘅民望雖然仲處於「表現不彰」嘅評級，但係都升咗百分之四，比起佢之前算係止跌回升少少，點解佢咁避忌？

可能因為佢唔想踩多佢班上司一腳，又或者佢心虛囉。因為呢份民調進行期間，唯一同佢有關嘅就係鄧忍光空降做廣播處長，當時港台員工鬧爆掌管廣播處嘅商務及經濟發展局，但蘇錦樑就冇咗影，反而由常任秘書長謝曼怡出嚟解畫，幫佢擋箭。唔知係咪「少做少錯，唔做唔錯」，佢翹埋雙手乜都唔做，民望就升咯，咁佢又點好意思回應民望低呢個問題吖！