政壇：fb吹噓政績網民插爆「曾無恥」

煲呔曾妄想喺後日發表任內最後一份施政報告，為佢低處未算低嘅民望力挽狂瀾，呢幾日動作多多，最新力作係尋日透過Facebook群組發表一篇虛情假意嘅文章，換嚟嘅係畀大批網民插爆，怨氣爆燈。佢嗰篇文章對香港嘅深層次矛盾只係輕輕帶過，反而集中吹噓香港經濟喺佢領導下有好大成果同進步，話自○七年起，香港經濟總量實質擴張咗百分之二十一，人均GDP亦增加咗百分之二十二喎。嘩，市民生活水深火熱之中，全港都感受到，偏偏係佢乜都睇唔到咁囉。

網民睇到眼火爆，Elvis Ip戳破：「唔係閣下一直唔肯起居屋，香港人唔使搞到今時今日連個竇都冇囉！」黃允幟就直言：「相信普羅大眾都想到以下三隻字：我辭職。」Danny Chin好悲觀咁話：「早走早着！不過下一任可能更衰！」最一語中的相信係Gordon Choi：「你唔好下世先做？」

煲呔曾自取其辱，網上最新流傳兩幅漫畫，一幅係由著名畫家Cuson創作，畫中嘅小朋友測驗得四十分，但仍夠膽講已經算唔錯，因為連煲呔曾都係咁講喎。另一幅仲好笑，話煲呔曾嗰四十分民望分別來自「無恥」、「黑面」、「擦鞋」同「當奴」各十分。