政壇：關懷少數族裔 范太叻過「候選人」

喺參選下屆特首事宜上，全國人大常委范徐麗泰一再轉口風，究竟最終決定係點？仲係未知之數，睇嚟真係要到咗特首選舉提名先可以揭盅。

雖然係咁，但范太冇採取逃避公眾同迴避傳媒嘅態度，繼續出席不同嘅活動，尋日佢就去咗融樂會同班少數族裔嘅年輕人真情對話。

唐唐唔覆 CY唔嚟

佢話好開心可以聽到好多少數族裔年輕人嘅心底話，又話班少數族裔雖然喺香港住咗咁耐，但喺睇同寫方面仲係冇符，政府要諗吓計幫吓佢哋喎。

唔知係咪驚畀人話落區做騷，范太多次強調今次落區探訪同特首選舉冇關，又話會將呢段日子嘅所見所聞寫成文字，交畀政府當局，盡番監察政府嘅責任。

安排呢次會面嘅融樂會總幹事Fermi王惠芬，大讚范太係第一個肯同少數族裔傾偈嘅政治人物，仲話好想有其他疑似特首候選人肯落區，了解少數族裔喺就業、學習等方面嘅問題，佢曾經寫咗好多次信，邀請前政務司司長唐唐落區探訪，但唐唐就覆都冇覆過。

Fermi又話五、六月嘅時候，都有試過邀請另一位疑似候選人前行政會議召集人CY梁振英去機構探訪，但係一樣被拒絕。佢話，雖然呢班少數族裔冇權投票選下屆特首，但佢哋係香港嘅一分子，希望啲疑似候選人關心吓佢哋嘅需要，唔好當佢哋透明。

咁又係喎，CY前排不停咁落區，關心低下階層嘅生活，而唐唐日前亦正式展開探訪工作，仲去咗一間機構同啲青年傾偈，雙方都話要聽社會各界唔同嘅聲音同埋意見，爭取社會上各階層嘅支持，咁點解佢哋對少數族裔就唔多睬呢？似乎有啲選擇性關心喎！