養老津貼小恩惠 厚此薄彼玩歧視

港府將長者當包袱，安老承擔卸得就卸，少少福利，多多設限，正一冷血兼刻薄。

可能畀人鬧得多啩，孤寒財主終於肯鬆吓手。據講，煲呔曾喺任內最後一份施政報告會有新搞作，打算推出回鄉養老津貼，金額同生果金差唔多，即係約一千蚊咁大把，同時亦會放寬長者首次申領生果金嘅離港限制喎。可惜吖，唔係所有住喺內地嘅本港長者都有份，淨係限於廣東嘅咋，問你服未。

本來呢，有津貼好過冇津貼，就算濕濕碎，總算聊勝於無，之不過咁，家陣內地生活水平高企，同香港相差無幾，而且人民幣匯率係咁升，港幣愈來愈唔見使，一千蚊津貼究竟可以用來做乜嘢，真係天曉得。

正如關注團體指出，養老津貼唔湯唔水，根本唔夠長者喺內地頤養天年。有立法會議員狠批港府：「聲言要解決人口老化問題，但只係推晒去大陸，卻又畀唔夠錢人。」長者日子難捱，港府唔係關人個關，就係小恩小惠，簡直豈有此理。

好話唔好聽，養老津貼買鹽唔鹹，買糖唔甜，已經畀人話孤寒，當局仲要諸多限制，初時只准住喺廣東省嘅長者申請，理由係超過六成回鄉生活嘅本港長者都住喺廣東喎。喂，唔通另外嗰三成幾長者唔係香港人咩？唔通返福建、廣西、北京、上海等地養老，就要被打入另冊？你話咁嘅政策係咪九唔搭八吖！

叮！就算港府再列出一千條理由都講唔通喇。如果回鄉長者唔喺廣東居住就冇得享受福利，咁點解退休公務員嘅長俸完全冇限制，可以喺任何國家攞？唔通公僕真係高人一等？

同人唔同命，同遮唔同柄，退休公僕做寓公，回鄉老人要捱窮，港府親疏有別，內外不同，咁分明係大細超，玩歧視啫！唔好唔記得，香港有歧視條例，港府咁搞法，隨時畀人告到甩褲都似。

安老唔係做騷，唔可以求其派粒糖就想過骨。咪話太一叮唔提醒吖，如果煲呔曾諗住就快收工走人，對安老問題虛應故事，甚至玩歧視，小心臨別秋波變臨尾香吖，叮！