CULTURE嗡：80後精明網購

網上購物大行其道，除可透過網上拍賣及大型購物網站外，近期還有團購，深受80後歡迎。事實上，80後的消費模式正在轉變，不少人逛商場只是window shopping，返家才online 購物。嶺南大學社會科學經濟系主任何濼生指出，網上購物的價格較商舖便宜，在通脹不斷升溫下，年輕人也要設法慳錢。

這次找來經常於網上購物的80後少女Brenda，分享看法。

Brenda：大約喺六年前，我第一次喺網上購物，係喺外國網站購買香港仍未推出嘅別注版product。直到近年，內地的購物網站遍地開花，貨品類型繁多，我就透過呢類網站，購買衫褲鞋襪、日用品甚至大型傢俬。

何：網上購物已成為一個大趨勢，愈來愈多年輕人咁做。其實，網絡流行普及，商人乘機推出這種購物模式，方便經常上網的80後，令網上購物日益盛行。

Brenda：網上購物最大好處，就係價錢較舖頭便宜，有可能相差一大截。例如我依家戴緊嘅手繩，係舖頭度買要成七、八十蚊，甚至成百蚊條，但我喺網上買，只係一蚊、兩蚊條，計埋運費，都仍然好抵！所以，我依家行商場睇啱嘢，唔會即刻買，會返屋企上網睇吓有冇，搵過無先會返舖頭買。

何：網上出售嘅物品，價錢較商店便宜，因為佢哋唔需要畀舖租，大大減低成本，同時，網上商店不受地域限制，可以滲透到不同地區，有助推高生意額。當銷量增加，就可以減低售價。

Brenda：不過，網上購物都有唔好嘅地方，就係見唔到實物，唔可以知道件貨品嘅真實大細及用料，所以經常有貨不對辦嘅情況，又會收到啲品質較差嘅貨品，我每十次買嘢，約三次會有呢類問題。仲有，喺舖頭購物嘅過程，本身就係一種享受，網上購物就無法享受呢個過程。

何：喺網上購物，風險較舖頭高，除貨不對辦外，買家都唔會知道貨物嘅來源，有可能買到次貨甚至係賊贓，所以必須小心。

Brenda：網上購物雖然有一定風險，但價錢吸引，愈來愈多朋友咁做，我都會繼續網上購物，買更多啱自己心水嘅貨品！