政壇：黃子欣娶新抱政商雲集
《福布斯》香港富豪偉易達主席黃子欣（Allan）尋日下晝娶新抱，新郎哥黃以禮（William）同新娘子Ophelia喺中環花園道聖約翰座堂行禮，邀請咗政商界逾二百人見證。William遺傳咗爸爸嘅創業精神，唔靠父蔭自創毅力科技公司，家吓抱得美人歸，爸爸梗係笑得合唔攏嘴啦。
尋日見證一對新人行紅地氈嘅名人多不勝數，包括財經事務及庫務局局長陳家強、金管局總裁陳德霖、前財爺梁錦松、合和實業主席胡應湘夫人胡郭秀萍同囝囝胡文新、女童軍總會副會長梁王培芬、立法會議員林健鋒（Jeffrey）等。
