政壇：狄志遠叫唐唐反省婚外情
唐唐爆出婚外情後，社會各界議論紛紛，論者仲不約而同認為唐唐處理事件嘅手法唔好，至於喺特首辦主任任內被揭涉緋聞嘅平機會主席林煥光，一聽婚外情就擰頭唔回應，話留番畀公眾評論。
香港家庭教育學院主席狄志遠尋日鬧得好狠，佢話市民對於公眾人物，無論喺工作操守或家庭上都有一定嘅要求，今次唐唐爆出婚外情，相信對唐唐會有負面影響。狄又話，唐唐交代得唔好，令大家都有好多疑問，希望佢可以做好啲，如果有反省、肯改變，對其他公眾人物都有一定嘅警惕，會留意個人操守同家庭生活。
骨科名醫高永文出席個活動時話，唐唐處理件事嘅手法唔好，對將來特首選情一定有影響。