政壇：搞搞政：葉劉倡派大利是谷生育

香港地生育率好低，政府搞人口政策咁多年，又推出新生嬰兒額外免稅額，但本地年輕一族依然唔願生。新民黨主席葉劉淑儀尋日出席一個論壇時，就拋咗個派利是嘅建議出嚟，即係向生育嘅市民派大利是，既幫補奶粉錢，又可藉此催谷出生率。

葉劉尋日出席工聯會一個勞工權益論壇，工聯會近期加大力度猛推男士侍產假，葉劉大力贊成設立侍產假外，仲即場建議政府喺財政儲備充裕下，應該考慮向生育嘅市民派大利是，獲得唔少掌聲。佢話，侍產假技術上同運作上都冇大問題，只要政府有決心就一定推行到，跟住語帶雙關咁話，政府咁鍾意推行一次性措施，咁就不如索性每次生BB都派封大利是啦，當係幫補吓奶粉錢都好嘛。

葉劉呢個建議唔算石破天驚，但都值得研究吓。不過，講到標準工時立法，葉劉就有保留，佢話唔少律師行、投資銀行嘅精英工時好長，但人工就好高，有啲人想力爭上游，如果限制工時只會適得其反，立法亦要從長計議喎。