政壇：袁莎妮帶挈肥胡「遇襲」
近排唐唐單婚外情成為熱點，香港總商會新任總裁袁莎妮（Shirley）被傳係女主角，成日畀人包圍，幾個大商會早前搞咗個講《競爭法》嘅聯席座談會，總商會主席「肥胡」胡定旭同Shirley都有出席，結果肥胡因為眾人爭住採訪Shirley，竟然無辜「中頭獎」。
話說當日座談會開始前，肥胡接受傳媒訪問講競爭法，期間風頭人物Shirley忽然出現，一班傳媒即刻揼低肥胡，一窩蜂衝過去追訪Shirley。混亂之間，有電視台攝影師唔小心將部攝影機撞到肥胡左邊頭，肥胡即刻痛到嗌救命，好彩冇流血咋，據講「襲擊者」都有慰問同沙冧。
肥胡因為傳媒追訪袁莎妮而被電視台攝影機扑親個頭。