政壇：煲呔曾屎橋青年離港搵工

煲呔曾今個禮拜三就會發表任內最後一份施政報告，近日唔少團體都清算佢任內嘅缺失，話佢治港六年幾民生、民權都大倒退。尋日佢接受一個電台節目錄音訪問，忽然就房屋政策認低威，同時死撐依家失業率僅百分之三點幾，香港既冇經濟衰退同其他政府面對嘅財政問題，已經好好，為自己塗脂抹粉之餘，轉過頭卻呼籲啲青年人搵工要「全球化」，企圖將青年就業嘅包袱揮出香港，真係自打嘴巴！

煲呔曾尋日口口聲聲話本港失業率好低，但本地二十五歲青年組別失業率高踞雙位數嘅問題，卻係人人都知嘅事實，80後、90後嘅無助已經轉化為怨氣，甚至係衝擊建制嘅助力，煲呔曾沾沾自喜又點蓋得到呢啲事實﹖

鬍鬚曾爛泥扶唔上壁

不過，厚面皮嘅煲呔曾就攞多個歐洲國家城市為例，當地青年運動都係話政府冇公義、個人冇前途，然後話鋒一轉，話香港已經好好嘞，暗示本港青年應該醒醒定知足，佢口講明白後生仔嘅憂心，但聽真啲就知只係鄙視一眾青年：「如果我係二十歲嘅話，我會打開報紙睇睇外地有乜職位，依家嘅後生仔適應力強、拚搏力強，唔好只喺香港競爭，香港後生仔係有本錢嘅，好似喬布斯（蘋果電腦已故舵手）咁，都經過幾多坎坷先走咗出嚟啦！」煲呔曾可能以為呢招輸出法可以減低本地青年嘅怨氣，但勢必引來更大反感。

講完呢筆，我哋都聽到一宗政壇八卦，話說煲呔曾同佢嘅曾兄弟、財爺鬍鬚曾一直攬埋一齊，據聞早前煲呔曾趁唐唐請辭政務司司長參選特首向北京建議由鬍鬚曾頂上，但有關建議好快就宣告難產，有人估計同鬍鬚曾冇得過渡至下屆政府，以及另覓財爺人選難度有關。直至林公公成為熱門後，煲呔曾仲未死心，借政界有唔少反對林公公嘅聲音過橋，為鬍鬚曾再上訴，奈何鬍鬚曾爛泥扶唔上壁，孖曾想唔死心都唔得！