曾蔭權錄音訪問重點及各界反駁

曾蔭權錄音訪問重點

房屋政策失誤 賴上屆政府：

老實講我哋有啲嘢有失誤，特別係房地產泡沫爆破後，停止做一切嘅嘢；整個市場、政府同商界反應過劇都未定，冇諗過整個市場復甦得咁快。

蔭權七年有進步，貧富懸殊無問題：

資本主義社會一定有貧富懸殊；○七年至今，香港喺民生、經濟同政治都有顯著進步；香港人抗拒強積金同強制性醫療供款，全民退休保障呢類「大鑊飯」制度香港難達共識。

民怨煲爆、民望插水無感覺：

我自己唔感覺到問題，香港係多元化社會，唔能夠要人人都同情你；經過七年嘅洗禮（民望）仲有四十幾分已經相當唔錯。

各界反駁

立法會議員李永達：

由佢做財政司司長、政務司司長以至特首，啲政策都喺佢手，佢做政務司司長時停咗居屋，土地儲備又取消，勾地表政策都係佢發明，佢睇唔到土地儲備重要性，係好大失誤，肯定係佢錯晒。

社區組織協會主席 何喜華：

曾蔭權嘅講法係無知同卸膊，為自己開定後路。根本個問題係政府太偏幫金融、工商界同地產業，令少數人賺晒大多數嘅錢，強積金亦係咁，市民要求嘅係中央公積金，唔係任由銀行魚肉，用市民嘅錢去做炒賣。

立法會議員李卓人：

曾蔭權咁講好阿Q囉！七年四十幾分相當唔錯？即係唔攞零蛋就好好呀？佢咁講係教壞學生啫。