醫管局醫死人 周一嶽咪卸鑊

港府高官呢份工真易做，一招卸膊神功乜都搞掂，就算搞出人命咁大鑊，側側膊就可以事不關己，逢凶化吉。講到卸膊神功咯喎，人稱「周一鑊」嘅食物及衞生局局長周一嶽認第二，睇怕冇人敢認第一。

十三歲男童張睿霆早前喺屯門醫院接受頸椎手術後死亡，事件疑團多多，家屬誓要討回公道，要求當局交代真相。周一鑊回應時扮晒「正義化身」，話仲未收到調查報告，要求醫管局盡快交代事件喎。

咪住！公立醫院懷疑手術失當醫死人，係咪食衞局局長嘅問責範圍先？周一鑊打晒官腔大大聲要醫管局解釋，唔通佢自己就唔使向市民交代？

俗語講得啱，當你用一隻手指指向人哋，同時會有四隻手指指向自己。呢次醫療事故有好多疑問，手術點解超過十粒鐘、喺乜情況下拔喉、手術係咪符合國際水平、同外國專家「教學示範」有冇關係等等，當局統統未交代。既然周一鑊識得話有關手術「複雜及相當高危」，點解出咗事至表示關注呢？

公立醫院近年頻頻出事，醫療事故三五日就爆一單，導致好多病人枉死，周一鑊除咗卸膊塞責，有邊次主動問責，向市民清楚交代呢？

早排有病人喺屯門醫院接受微創手術清理腎石，本來手術並唔複雜，醫生亦話做得好成功，點知出院之後情況急轉直下要再次入院，卒之回天乏術。簡單手術醫死人，騎呢夾符碌個案更係多不勝數。呢，做手術輸血打孖擺烏龍，唔止搞錯血型，連病人性別都撈亂埋；病人左眼患白內障，手術前畫埋記號，醫生居然將麻醉針打落右眼。男女不分，左右不辨，問你驚未，叮！

正如有人話齋，公立醫院嘅事故，沒有最怪，只有更怪。東區醫院啱啱被踢爆，非本地孕婦預定產床嘅電話熱線，每周只得四日有人接聽已經夠離譜啦，原來仲要每日只開一粒鐘，而且只得一個人接聽，唔怪得有市民搵咗廿名親友打足四日都冇人聽，大鬧呢條係「511呃人熱線」。院方仲狡辯，話係為咗避免浪費人力同時間喎，簡直不知所謂！

公立醫院管理七國咁亂，唔該周一鑊睇清楚自己張卡片上面嘅銜頭，食衞局局長唔係得個食字，仲要為醫療衞生服務把關o架。計太一叮話齋，周一鑊扮晒旁觀者，乜都唔關自己事，咁不如改個銜頭，就叫「食飯局局長」喇，笨！