政壇：錢果豐辭任中華網母公司
港鐵主席錢果豐八足咁多爪，除咗為港鐵睇檔外，又係恒生董事長，亦係多家上市公司嘅非執董，名銜咁多，有關上市公司嘅通告梗要小心加細心。尋日傍晚，港鐵同恒生及錢果豐相關嘅幾間公司發通告，交代錢果豐已辭去喺納斯達克上市嘅公司CDC主席及非執董職務，請辭嘅時間正係CDC喺當地申請破產保護之前一日。
CDC係本港上市嘅中華網嘅母公司，中華網喺科網年代紅極一時，但科網熱爆破後就謝咗，而CDC就喺早幾日向美國法院申請破產保護。
雖然中華網尋日已經喺通告交代，CDC自願申請破產保護，以便完成架構重組及恢復長期財務健康狀況，並強調此舉不會影響中華網嘅業務運作，惟中華網股價昨日急跌12.69%收報2.2元，錢果豐家吓亦係中華網嘅非執董。