政壇：港英餘孽密會斷正
政圈正值多事之秋，尋日好多傳媒喺香港會等候採訪疑似特首候選人唐英年（唐唐）同行政會議成員梁智鴻會面，點知唐唐鬼祟臨時改地點，傳媒按兵不動之下，竟然撞破以煲呔曾為首嘅多名港英餘孽行出嚟，「民主阿婆」陳方安生同前投資推廣署署長盧維思等人到底斟啲乜？真係耐人尋味。
尋日下午兩點幾鐘，唔少傳媒喺香港會門外等緊，竟然等到煲呔曾同前行會成員范鴻齡、前教統局局長李國章、馬會前主席陳祖澤排住隊行出嚟，之後又有民主阿婆等，佢哋唔遲唔早一同出現，話佢哋唔係撐枱腳都冇人信啦！
到咗傍晚時分，唐唐匆匆入咗香港會，之後竟有大批政府車輛駛至，當中包括保安局局長李少光及副局長黎棟國、教育局局長孫明揚，據講係為已退休嘅前食物及衞生局常秘李淑儀餞別，共有百多人出席，非常墟冚。