政壇：搞搞政：霍震霆死咬唐唐婚外情

唐英年爆婚外情成為全城焦點，政圈雖因特首選舉分咗挺唐派、挺梁派，但婚外情風波後，政圈又多咗個針對婚外情風波嘅堆，好似同樣傳有婚外情嘅金融界立法會議員李國寶（寶Baby）就大力挺唐，話婚外情「好小事啫」；涉嫌向女助理求愛不遂嘅白鴿黨甘乃威，亦話唐唐嘅處理手法有改善空間；曾經離婚又再婚嘅白鴿黨李永達更輕輕帶過，唯獨婚姻失敗嘅霍震霆發威要求唐唐向公眾交代事件。

議員討論不停，勢令唐唐要民望止蝕嘅美好期望告終，經歷過婚姻失敗嘅霍震霆忽然神勇，覺得唐唐應該清楚交代事件，仲話作為公職人物，點都要同公眾有個交代，唔可以就咁算數。霍震霆平時講嘢都唔會多過兩句，今次咁講，係有感而發定反映內心深處嘅一面呢？點都好，連霍震霆呢啲建制派都要求佢向公眾交代清楚，事件真係好容易成為另一個政治風暴，唐唐嘅桃花劫睇嚟有排傷。

好笑嘅係，唐唐婚外情醜聞亦變成立法會議員嘅感情觀照妖鏡，曾經離婚又再婚嘅李永達唔敢猛批唐唐，只係話「界線要清清楚楚」，輕輕帶過就算。同樣有好感前科嘅甘乃威亦出手好輕。當年被踢爆同創興銀行家族後人廖碧欣喺巴黎把臂同遊嘅寶Baby更覺得事件小兒科。