政壇：議員贈興鬥踩新立會

立法會內會尋日首次喺新大樓開會，呢個亦係新大樓嘅第一個會，日前議員試用會議廳已媽聲四起，尋日反應一樣咁差，劉皇發、李卓人、王國興等唔係彈會議室大而無當，就係批評距離太遠，鬧得好開心，完全唔記得咗立法會秘書處先先後後為咗會議設施諮詢過佢哋N咁多次，結果浪費咁多納稅人金錢起咗個超豪大樓，用家又扮起受害者嫌三嫌四，真係令人火滾，或者審計處應該查吓到底係議員諮詢期間瞓咗覺、定係政府主導嘅設計同建築走咗樣？

太大不便 要用望遠鏡

添馬艦政府新總部耗資五十幾億元興建，嘥咗咁多公帑，理應小心處理每一個環節，內務委員會以及財務委員會尋日喺新大樓會議室一舉行，好多議員會後都話新大樓太大，鄉議局主席劉皇發喃喃自語「使乜嚟呢度呀？以前咪仲舒服」！

富貴黨方剛亦覺得新大樓大到好唔方便，職工盟李卓人就比喻，依家議員之間距離遠咗，互相打眼色或者互睥，真係用望遠鏡至掂。外號「三點不露」嘅金融界代表李國寶，更走咗去同秘書長吳文華反映新大樓太大，吳文華即時答佢，對秘書處嚟講係唔夠大o架！

不過，首日開會啲議員就懶懶閒，兩點半夠鐘時，唔少議員先施施然行入嚟，但又唔知指定座位喺邊，結果專業會議嘅梁美芬同埋霍震霆都要問職員先入到位。新大樓嘅議員座位都有獨立電腦，但唔少人寧願用私伙，不過佢哋想上網都唔係咁易，建仔嘅陳克勤就搞嚟搞去上唔到網，被迫叫職員幫手。工聯會王國興又煩佢腳底嘅踏腳板，總之就係人人都有怨言，納稅人最閉翳。