都市炸彈不勝防 塌篷皆因官懶惰

記得今年六月屯門發生嘅塌簷篷意外嗎？當時冇風冇雨，一幅四十米長、重逾百噸嘅工廠大廈石屎簷篷話冧就冧，一名工人走避不及被擊中重傷，幾乎搞出人命，事後屋宇署煞有介事對事故展開調查。好喇，調查終於完成，聽吓屋宇署點講先。

屋宇署話喎，出事工廈嘅防水批盪封咗去水位，影響簷篷排水，導致積水滲入令鋼筋銹蝕，意外與簷篷嘅設計無關，只係缺乏適當維修保養，由於不涉及違例工程，所以唔會提出檢控。該署仲話，事後巡查咗全港三千七百幢有同類簷篷嘅大廈，發現當中六百幢大廈嘅簷篷維修不足，例如混凝土剝落、排水及僭建等，但都無即時危險喎。

叮！港府靠得住，豬乸會上樹，佢哋話無即時危險啫，你信唔信吖？當年赤柱塌樹砸死人，當局事前夠話嗰棵病樹無即時危險咯；仲有吖，舊年土瓜灣冧樓死人，當局事前咪又係誓神劈願指嗰幢甩皮甩骨嘅唐樓無即時危險。所以呢，今次屋宇署話六百個維修不足嘅簷篷無即時危險，大家就要小心喇！

其實，天災皆因人禍起，屯門塌簷篷傷人意外，正正係因為屋宇署失職而起。該署十幾年前已對肇事工廈兩度發出修葺令，但之後就關人個關，一直無跟進，卒之釀成災禍。試諗吓，如果屋宇署加強巡查，認真跟進，會唔會發生呢宗事故呢？該署指大廈不涉及違例工程啫，但官僚辦事求其，敷衍塞責，又使唔使對事故負責呢？

講開又講，香港話就話係國際都會，可惜遍地都係都市炸彈，簡直失禮死人。呢，危險簷篷、僭建招牌、殘舊唐樓、病危樹木等等，幾乎無處不在，令人防不勝防。古人話「君子不立危牆之下」，但今時今日嘅香港人唔只立於危牆之下，仲要立於危樹之下、危篷之下，隨時飛來橫禍，你都咪話唔驚。而更淒涼嘅係，萬一唔好彩中招咯喎，死咗都可能變成孤魂野鬼，因為隨時搵唔到骨灰龕位棲身吖！

無論點都好，人命關天，唔講得笑o架，唔該屋宇署班官僚醒醒定定，負起責任做好份工，應該監管嘅就要監管，應該巡查嘅就要巡查，應該維修嘅就要維修，應該檢控嘅就要檢控，千祈咪再偷懶吖。如果唔係，萬一再發生冧樓死人、塌篷傷人等等，到時新帳舊帳一齊計，你哋實走唔甩o架，叮！