政壇：張曼娟記招聽歌食土產
台灣暢銷小說作家張曼娟上月上任做香港光華新聞文化中心主任，下禮拜二首次以呢個身份開記者會，話帶咗份神奇禮物畀大家。係乜禮物？咪就係宣傳「二○一一年台灣月」活動囉！
不過，可能唔想令人覺得太硬銷，身為小說作家嘅佢就發揮創意搞搞新意思，請咗台灣創作女歌手魏如萱現場獻唱，仲話帶咗台灣秋日收成嘅「好滋味」送畀大家咁話。開記招有歌聽有嘢食，認真有創意。
唔單止搞記招，佢仲會喺香港親自主持多個「台灣月」活動，包括請台灣當代文學大師來港舉行座談會，又會同知名人士講吓北投特色台灣菜，真係活動多籮籮。
張曼娟一上任香港光華新聞文化中心主任就發揮創意，搵歌星喺記招獻唱。（資料圖片）