政壇：廣發丁世民升呢做「教授」
原來廣發期貨（香港）副總經理Simon丁世民以前喺幾間大專院校教過期貨投資課程，所以行內行外都有唔少徒弟同學生，難怪有人會講笑咁叫佢做「丁校長」啦！不過唔講唔知，原來早前佢返咗內地做投資講座，兼且見客，於是搖身一變，由丁校長升呢做丁教授嘞！
Simon解釋話：「我同佢哋講話自己做咗呢行好耐，喺香港有唔少學生，所以有個花名叫做丁校長，點知佢哋竟然自動幫我改名做丁教授，搞到我即刻澄清，個場面都幾好笑o架！」
其實，自從佢加入咗廣發期貨後，返內地見客嘅機會多咗好多，早前佢就喺兩個禮拜內走訪六、七個城市，例如去咗番禺、佛山、惠州等做投資講座。嘩！日日都要舟車勞頓，你都咪話唔辛苦。