政壇：搞搞政：大輝議會通訊飛起唐唐

眾所周知，廠商會嘅立法會代表林大輝係疑似特首候選人唐唐嘅「家臣」，撐主子嘅舉動多多，記得佢早前嘅議會通訊就以唐唐做封面，發盡力幫唐唐宣傳，而喺唐唐未辭去政務司司長一職前，仲好高調咁、當正自己係唐唐發言人咁同傳媒講嘢，撐唐唐之餘，又開口勸退其他候選人，甚至預測埋唐唐幾時會辭職。

睇嚟大輝真係瞓晒身幫唐唐上位，但傳媒尋日收到佢最新一份九月號嘅議會通訊，翻到份通訊爛咁滯，都搵唔到唐唐嘅相或資料，反而煲呔曾就有好幾段。有蹊蹺喎！唔通因為唐唐自爆有婚外情，為咗避嫌又或者怕愈描愈黑幫倒忙？咁就只有佢自己先知嘞。

通訊入面提到一單趣事，話佢早排買入三歲嘅新賽駒「太奇妙」，但因公務繁忙，一直冇時間去探佢，直至立法會休會期間，先有機會去沙田馬房幫佢打打氣，點知「太奇妙」見到佢時表現得特別活潑同熱情，仲喺大輝餵佢食紅蘿蔔嗰陣輕輕咬咗佢嘅手指一啖。