政壇：新立會電子門失靈困人

近期添馬艦立法會新大樓多次被揭軟硬件甩甩漏漏，堪稱豆腐渣工程，尋日又爆出一單醜聞。話說尋日下晝時間，新大樓八樓立法會議員辦公室走廊嘅大門，突然傳出一陣又一陣猛烈敲門嘅聲音，甚至傳出有人向木門拳打腳踢，後來發現原來八樓嘅全部電子門鎖失靈，裏面議員同助理被困，再發生疑似禁錮事件。

今次受害嘅主角係立法會議員Tanya陳淑莊，被困足足十幾分鐘。回想事發經過，佢話見到隸屬其他議員辦公室嘅職員不斷大力推門，更有人試圖踢開道大門添。搞到咁激，皆因八樓全層所有電子門鎖都失靈，議員辦公室嘅門鎖有出無入，而通往電梯大堂嘅大門門鎖更出入都唔得，如果新大樓發生火警，情況真係不堪設想。Tanya都有參選中西區區議會山頂選區，佢嘅對手係富貴黨嘅陳浩濂。

立法會主席尋日仲承認新大樓仍有鼠患，遷入一個月已捉到兩隻老鼠，但佢話地盤有老鼠不足為奇喎，遲啲會進行一次徹底滅鼠行動。