衝閘分娩倍升 醫局欺善怕惡

你有張良計,佢有過牆梯。醫管局「落閘」停收內地孕婦,以為可以紓緩公立醫院嘅壓力,點知結果仲大鑊,愈來愈多內地孕婦轉衝急症室分娩,搞到七國咁亂。

今年頭八個月,內地孕婦衝閘分娩個案已接近八百五十宗,比舊年同期多一倍,而明年全年數字估計將會高達一千五百宗添。咁搞落去,唔止產房逼爆,急症室亦會隨時癱瘓,問你驚未!

急症室隨時跪低唔講得笑,弊在醫管局冇對症下藥,而係病急亂求醫,計劃一旦公立醫院爆棚時,就游說已經預約嘅內地孕婦接受退款,放棄喺公立醫院分娩,轉去私家醫院生仔喎。

咁都得?當初醫管局應付內地產婦湧港規劃失當,搞到一鑊泡,嚴重影響本港孕婦分娩,焗住整個預約制度出嚟平息民怨。人哋聽晒當局話,依正規矩辦好預約,家陣因為唔守規矩衝閘生仔個案激增,局方就本末倒置亂咁嚟,失驚無神要求人哋收錢走人,讓位畀打尖嘅人,當局唔止係自打嘴巴,直頭就係欺善怕惡喇,叮!

咁搞法,會令辦咗預約嘅內地孕婦面對不必要風險,唔只對佢哋極之唔公平,對公立醫院同私家醫院嘅產科服務亦構成更大壓力。正如有婦產科專家話齋,有關安排「正常人都唔會制」,應該大幅調高未經預約衝閘分娩嘅收費,以收阻嚇作用。

講真,孕婦臨盆至衝去急症室,出於人道考慮,醫院唔可能唔收。問題係,預約制度已經實施,點解仲有咁多內地孕婦冒險衝閘分娩?查實,如果源頭把關做得好啲,拒絕冇辦預約手續嘅內地孕婦入境,又點會搞到急症室呢道最後防線幾乎崩潰吖,叮!

食衞局局長周一嶽早排至信口開河,承諾加派人手到口岸協助檢查。點知又係吹水,實情係只有羅湖及落馬洲有醫生派駐,而且負責把關嘅十二名合約醫生中只有一人屬全職,其他都係兼職,唔怪得甩甩漏漏喇。

呢,上半年邊境口岸曾接受查詢嘅近二萬宗懷疑內地大肚婆個案中,由醫生檢查嘅唔到一成,大部分懷疑個案只係由入境人員判斷,最弊佢哋處理入境事務已經周身唔得閒,對婦產科又毫無認識,又點樣把關吖?

話時話嘞,就算邊境(目及)到實又點吖,港府唔先堵塞法律漏洞,改變「內地港產嬰」享有香港永久居民身份嘅做法,點樣落閘點樣把關都冇用喇,叮!

「Money18免費即秒股票報價網站」現推出8升級功能,財經資訊,實時實發!