政壇：張德祥妻鍾情張大千畫作
蘇富比前日搞中國書畫秋季拍賣會，場內見到頂尖男裝品牌「詩閣」（Ascot Chang）董事總經理張德祥太太范元芳，原來佢對張大千嘅作品情有獨鍾，家中收藏唔少大師嘅巨幅潑墨畫作，當日喺拍賣會見到咁多大師作品，佢就算冇出手競投，大飽眼福已心滿意足。
雖然今次有幾幅大師張大千作品公開拍賣，但張太志不在此，而係一睹大師愛女張心嫻嘅珍藏展覽，尤其係首度公開嘅潑墨潑彩紙本六摺屏風《夏山隱居》。
張太仲喺拍賣會入面買咗本張心嫻嘅回憶錄《在爸爸身邊的日子—憶父親張大千》，笑言可以幾日不出門，細心品味回憶錄一番喇！