有傳媒喺早幾日搞咗個立法會「去舊迎新」活動，叫議員用跑步、踩單車等方式由舊大樓去新大樓。陳克勤就抽到籤跑步去新大樓，但見其他議員踩單車，佢又腳痕想踩番兩轉。
克勤仔話細細個曾擁有一架色彩繽紛嘅BMX「愛駒」，當時佢仲住喺石塘咀舊屋村，附近冇乜踩單車嘅地方，惟有出屋外條走廊度踩，否則就要去到西環貨物起卸區，鍾意嗰度啲路夠闊落又平坦，但缺點可能會被狗追。
依家佢搬咗去沙田住，樓下有單車徑，但佢話屋企冇位擺單車，附近又搵唔到泊單車位，所以少咗踩喇。
克勤仔踩單車冇做足安全措施喎。
