政壇：搞搞政：搵銀大過天 鄭家富淡出

喺舊年政改一役同白鴿黨和平分手後，立法會議員鄭家富退出議會迹象愈嚟愈明顯，最新佐證係佢連政府帳目委員會委員都唔做，歸根究柢都係錢作怪。

帳委會往常都喺每屆立法會之初，由泛民同建制派協調好人選，跟住一做就做足四年。阿富日前去信立法會，話佢有私人理由要退出，搞到帳委會臨尾一年要換人。唔怕老實講，阿富嘅婚姻監禮工作做得有聲有色，幾年嚟應該搵到唔少錢，真係與其喺立法會開會，不如放眼世界搵真銀好過啦。大家有眼睇，阿富又無選區議會，又退出埋帳委會，試問除咗錢仲有乜嘢會令佢放低咁多嘢？佢喺帳委會個位本來係白鴿黨之物，據聞該黨想搵自己人做番，遲啲泛民主派飯盒會將會討論。

此外，白鴿黨副主席劉慧卿擔任嘅財務委員會主席之位，亦可能出現競爭。事關前晚建制派飯局上，有建仔議員問起有冇人有興趣爭財委會主席。究竟卿姐最終能唔能夠成功冧莊，聽日首次喺立法會新大樓舉行嘅財委會自有分曉。