政壇：傻強食回頭草有着數

財經事務及庫務局局長「傻強」陳家強本身係世界知名嘅經濟學者，加入政府前係香港科技大學工商管理學院院長，在任幾年將科大商學院辦得有聲有色、工商管理碩士課程蜚聲國際，自己亦名列環球經濟學者名人錄（Who's Who in Economics），學生亦對該校嘅工商管理碩士課程趨之若鶩，傻強嘅成績可算相當輝煌。不過，可惜吖，佢○七年決定加入煲呔曾班子做問責高官，結果咪恨錯難返囉。

特首辦facebook尋日上載一段教大眾認識人民幣機遇嘅短片，片長七分鐘左右，傻強喺短片中侃侃而談，三言兩語已解釋咗唔少複雜嘅概念，呢種教學表現，同佢喺政府呢幾年嘅表現簡直係差天共地，公眾都唔係好知佢做過乜，淨係記得佢畀泛民主派突擊，令到財政預算案臨時撥款被否決，加上派六千蚊又派到不知所謂。

公平啲講，其實都唔怪得晒傻強嘅，皆因佢上司財爺鬍鬚曾本身就表現拙劣，幾年嚟除咗識得做守財奴外，其他乜都唔識，傻強跟住佢點會有運行呀。

清不抵濁被同化

鬍鬆曾呢個經濟外行人竟然做到香港最高級嘅財金官員，足以證明喺煲呔曾領導下嘅政府真係無奇不有。傻強當年以學者身份加入政府，好多人都寄予厚望，希望佢可以成為烏煙瘴氣嘅政府裏面嘅一股清流，奈何清不抵濁，佢畀「孖曾」同化咗，令到人人都大失所望。

觀乎傻強喺短片嘅表現，相信佢寶刀未老，反正夕陽政府剩番幾個月，與其同煲呔曾受萬人唾棄，佢倒不如跳船兼食「回頭草」，返去做學者好過啦。