建龕位一拖再拖 懶官僚話之你死

今日係農曆九月九日重陽節，亦係市民掃墓祭祖嘅傳統日子。提起拜山，今年有班孝子賢孫可能會特別傷感，事關元朗明月山骨灰龕場被法庭裁定違規，顧客嘅先人骨灰隨時被集體迫遷，呢鋪真係搞死人！

案情係咁嘅，安置逾二千龕位嘅明月山，上年遭港府列為違規嘅「表二」骨灰龕場，違反「鄉村式發展」土地用途，勒令停止營業。明月山不服，提出司法覆核企圖證明龕場係不受限制嘅「神龕」，結果敗訴。港府勝訴執番身彩，但近二百個龕位買家就頭痛咯，分分鐘血本無歸，最慘仲係先人身後無法安息，呢樣大吉利是吖嘛！

嗱嗱嗱，各位孝子賢孫，咪以為唔好彩嘅只係二百位明月山顧客。骨灰龕場唔可以當神龕，此例一開，其他以同類手法經營嘅龕場可能亦盡墮法網，受影響嘅市民同先人隨時不計其數。

唉，講落做香港人都幾慘，不少人生前買唔起樓，冇一個安居之所，死後一樣難搵容身之地，化成骨灰都要流離失所。話時話，係邊個搞成咁嘅呢？咪係港府班懵丙官僚囉！如果唔係當局短視卸責，缺乏長遠規劃，又點會搞到龕位供求嚴重失衡，違規經營氾濫成災吖！

即係咁，港府骨灰龕政策一塌糊塗，失禮死人，早係不爭嘅事實。激到人死咗都彈番起身嘅係，增建龕位迫在眉睫，但係懶散官僚死性不改，對龕位奇缺問題繼續唔嗲唔吊，市民有市民急，官僚有官僚歎慢板，話之你死！

嗱，其他唔講，就講港府上年七月先至大鑼大鼓咁話，分三階段喺全港十八區興建廿四個龕場。呢單嘢成年過咗嘞，新龕場連影都冇，首階段十二個龕場甚至連選址都未曾確定，再咁拖落去，唔通想拖到二○一二年世界末日？定係想拖到明年港府換屆，推個波畀下屆政府呀？

據講，因為今年有區議會選舉，所以建龕選址遇到唔少地區阻力喎。咁就死得啦！唔好唔記得，出年九月一樣有立法會選舉，到時地區勢力更加惡。港府拖泥帶水，敷衍塞責，建龕計劃等到落實真係要鬥長命！

太一叮好想提醒食物及衞生局局長周一嶽，睇你為官渾渾噩噩，增建龕位更加超級慢動作，對自己都冇好處，百年歸老同樣好頭痕。為人為己，快快解決龕位荒問題啦，唔係嘅話，香港人做鬼都唔會放過你，叮！