政壇：黃永光王嘉恩拉隊訪川震遺址
信和置業主席黃志祥公子Daryl黃永光，上月底就拍住同屬四川省政協嘅東源大地物流公司老闆Albert王嘉恩，一齊帶隊考察四川重建後嘅變化。
Daryl同Albert係四川通，帶隊到訪地震重災區映秀鎮及都江堰，唔少團友初次訪川，目睹災後扭曲變形嘅樓房遺址，大表驚訝。Albert話回想地震發生一刻，佢身在成都公幹，親歷猛烈搖晃，依家諗起都一額汗。
講番食，唔少得品嘗正宗麻辣火鍋，Albert介紹團友飲當地著名嘅「原漿啤酒」，標榜不含防腐劑，每樽保存期僅七日，雖然賣逾百元人仔一支，但團友都爭住飲番支。臨走前，團友又狂掃馳名兔肉乾，嗒落似豬肉乾，肉味濃郁，最啱買來做手信。
