政壇：立會迎新冧板傷李華明
立法會尋日喺新大樓搞迎新活動，包括睇升旗禮及綵排大會、內務委員會及財務委員會等各式會議，仲喺新大樓宴會廳食晏試菜，直到傍晚，立法會行政管理委員會就一錘定音決定搬屋，準備下周三復會。不過，尋日嘅綵排就發現新大樓仲有好多無名腫毒未清，仲有「豆腐渣」寫字枱添！
首先係用嚟計算議員發言嘅計時器好唔穩定，會無啦啦突然熄咗，跟住輪到白鴿黨李華明掛彩，話說佢喺會議室坐坐吓，突然間枱底有塊層板倒塌，刮損咗佢右腳，佢仲好心話好彩傷嘅係佢，萬一係女議員就慘喇。
新大樓問題多多，唔通真係要夾硬遷就煲呔曾喺新大樓宣讀施政報告不行？
