政壇：選特首遭冷落 鐵頭仁（火羅）爆

真係人算不如天算，白鴿黨主席「鐵頭仁」何俊仁尋日走出嚟話有意參選特首，又話要爭取泛民主派支持，咁啱疑似特首候選人唐唐同日自爆曾有婚外情，仲邊有人理鐵頭仁參唔參選吖，點知連同泛民行得好埋嘅教協都飛起佢。

被嫌煩飛出教協論壇

教協會長馮偉華尋日話，見疑似特首候選人好以講教育政策，所以諗住十月二十三號搞個公開論壇，搵嚟已經明確表態、又積極備選嘅疑似特首候選人同教協會員交流吓佢哋嘅教育政策立場，一嚟可以灌輸吓佢哋對教育政策問題嘅認識，二嚟又可以逼吓佢哋表態。

佢話見到唐唐同CY梁振英積極備選，仲連公職都辭埋，好明顯佢哋已表態會參選特首。至於尋日先開記招話有意參選特首嘅鐵頭仁呢？對唔住，馮偉華話因為何俊仁係區議會候選人，搵佢去論壇會「好麻煩」，所以冇叫佢。

嘩！咁即係唔畀佢入場啫！同鐵頭仁一齊競爭屯門區議會樂趣選區嘅候選人仲有人民力量嘅陳偉業同無黨派嘅沈錦添。

馮偉華話，論壇嘅形式會「好似」選舉論壇，但又強調唔係正式嘅選舉論壇。唐唐已答應出席，而CY亦都度緊日子。但大家唔使咁開心住，雖然唐唐同CY會出席同一個場合，但佢哋應該唔會有同台辯論，目前最大嘅可能性係，佢哋兩個前後腳分上、下兩場出現，一人講一場，馮偉華就話擔心兩位疑似候選人未準備好上擂台，又話佢哋分開表述立場會清晰啲。

其實搵得佢哋嚟又使乜錫住佢哋吖，畀佢第日做到特首，都要面對市民質詢o架喇！仲有，依家佢哋前後腳出現，教協喺安排先後方面都要小心會捉蟲，加上，冇正面交鋒嘅論壇，好睇極有限，教協要小心最後搭個台畀人抽自己水呀！