五毒喪報佗衰家 爛果銷量跌到趴

「機關算盡太聰明，反誤了卿卿性命」，呢兩句說話好多人都聽過，但想知道真正含意及感受咯喎，睇怕就要問淫賤黎喇。

嗱，淫賤黎搞份宣淫販賤嘅《爽報》，一心諗住渾水摸魚，搶佔免費報市場，將自己打造成「淫賤報業大亨」，點知大亨仲未做得成，已經惹起全城怒火，幾乎日日都有團體譴責《爽報》污染社會，荼毒青少年。而更好笑嘅係，淫賤黎自己打自己，打到同系嘅《蘋果日報》銷情慘淡，日日跌紙，害人不成反害己，今次唔慌唔「爽死了」。叮，呢啲就叫做自作孽，不可活喇，睇嚟《爽報》可能好快就要改名叫《喪報》咯！

呢，尋日又有多個團體踩上壹淫媒總部抗議，教育工作者聯會、教育評議會及婦女界代表怒轟《爽報》淫褻不雅，實為「五毒喪報」。邊五毒？毒害青少年、毒害社會、毒害家庭、毒害學校、毒害新聞，簡而言之，就係毒害成個香港。正如示威人士話齋，對付害人害物嘅淫賤傳媒，最好就係「送佢一程，完全毀滅」。

其實，「喪報當道，香港淪喪」，淫賤黎自己亦唔好得去邊嘅咋。好似尋日咁吖，雖然係星期日兼賽馬日，冇免費報派發，但爛果報嘅銷量仍然未止瀉，自稱印數只有三十萬八千份，比上個星期日嘅印數少咗一萬二千份，扣埋廢紙及賣剩回紙等，實銷數量估計足足跌咗三成，有啲報販甚至賣淨一半添。話時話，好彩《太陽報》及《東方日報》減價回饋讀者，銷量急升，報販先至可以補番條數咋。

叮，淫賤黎自作自受，五毒喪報被市民抵制派唔出，爛果報受到拖累賣唔出，今次真係滾水淥豬腸，兩頭縮，睇佢仲「爽」得幾耐！

當然，淫賤黎呢幾年誨淫誨盜，賺埋賺埋咁多昧心錢，就算喺台灣及香港兩邊齊齊燒錢，睇怕都仲有排燒嘅。最慘係《爽報》搞搞震，搞到免費報氾濫成災，嚴重浪費紙張，咁先至係大災難吖嘛。有環保團體估計，以香港每日印刷三百萬份免費報計，用紙量高達四百四十噸，一個禮拜發行五日，總共耗紙近二千二百噸，需要砍伐三萬七千棵樹，等於三個半維園面積嘅樹林，你話係咪恐怖吖？

所以話，《爽報》點止五毒，簡直毒害埋成個地球添。講開又講吖，淫審處前日已將《爽報》部分內容暫評為二級不雅，當局跟住會點樣處置呢？係依法辦事，定係繼續包庇淫媒呢？嗱，淫賤黎就話喪啫，你哋千祈唔好喪埋一份吖，全港市民都睇住o架，叮！