SUN世代：「快勞夾」王子編織飲食夢

要數年輕有為商界才俊，快勞夾大王杜振源孻仔杜擴業（Michael）絕對當之無愧。年僅二十四歲便開設公司，更搶攻大中華市場，拓展父親的快勞夾王國版圖。下過一番苦功，這名商界新丁，終蛻變成淡淡定的老闆。公司成立四年，曾創下每年逾千萬營業額，但他要求自己做得更好，目標是向飲食生意進發！

父親是World Wide文具集團主席，快勞夾賣遍全球，市場佔有率達五成，Michael難免感受無形壓力：「我希望爹哋會覺得個仔唔係太差、都有啲貢獻，所以努力做到最好！」眼前的Michael謙虛有禮，是一名肯學肯試的接班人：「爹哋唔想我加入公司，以為大樹好遮蔭，想我磨練吓，又話唔想我去World Wide，影響人事關係，就索性叫我獨立開公司。」

阿爸教落營商須公道

Michael是港大理科高材生，興趣是數、理、化，但畢業後走上從商之路：「爹哋做嘢咁辛苦，好想可以幫到佢。」○七年，他向父親借了七位數字的資金，成立通程國際（Lion Share），落手落腳學做生意，並瞄準內地龐大的快勞夾市場：「World Wide主要做出口去外國嘅生意，Lion Share就係打入內銷市場！」由於缺乏經驗，Michael惟有做足準備壯膽：「公司由零開始，乜都冇，要克服好多困難，好似請人、傾生意咁，所以要搜集好多資料，掌握市場情況。」

從開設廠房、設計產品、作市場推廣，對Michael來說都甚具挑戰，「做生意同做實驗好唔同，科學只有啱同錯，但商業上卻好彈性，有A唔一定有B。」但憑着他敢問敢博的精神，終於將問題迎刃而解：「曾經有個大客想用同一價錢簽一年約，但當時原材料不斷上漲，如果畀佢Lock咗個價錢，公司隨時蝕本，但個客佔我哋三成生意，唔做佢生意又唔得。」但他記住父親的教誨，營商必須要公道，做好能力範圍便可，他向客人提出反建議，合作方案最後達成了。

夢想開Club House

創業四年，Michael的公司逐漸上了軌道：「呢兩年每年都有八位數字生意額。」成績有目共睹，他卻未有自滿，希望能更上一層樓，不斷研究推出新產品：「文具行業雖然穩健，但唔靠創新，就走唔出個框框！」滿腦子大計的他更伺機把興趣化為事業：「我好鍾意紅酒、茶同雪茄，好希望將來開間Club House，賣嘢之餘，又可同嗜好相近嘅年輕人一齊去學、去玩，唔使斤斤計較賺幾多錢。」

Michael's Profile

現職：通程國際（Lion Share）有限公司主席

學歷：香港大學理學士（雙主修數學及物理）

興趣：紅酒、茶、打高爾夫球