政壇：鄭錦鐘睇多幾日趁低買股
呢排全球股市好似火燒連環船，港股亦跌到四腳朝天。尋日喺沙田馬場見到保良局副主席Eric鄭錦鐘，佢淡定分析話，港股背靠中國，唔差得去邊。呢次大調整，係趁低吸納良機，首選有「食力」嘅藍籌股，貪佢穩陣有息派，好過放喺銀行。咁講法，幾時撈底好?佢賣關子話：「睇多幾日先。」等股市喘定入市都未遲。
轉頭又見到一身紅噹噹嘅前港姐Cally鄺美雲為團體馬「好好運」打氣。佢一身貴氣打扮，果然招來旺氣，「好好運」喺第一場跑第三，袋逾六萬元獎金。佢都以行動撐愛駒，落注「買少少玩吓」，贏咗幾多？佢甜笑話：「最緊要開心。」
鄭錦鐘夫婦拍拖入場消遣。
鄺美雲着紅裙催運，果然招來旺氣。