政壇：嫻姐行山忘區選煩憂

工聯會「票后」陳婉嫻日前報名參加嚟緊嘅區議會選舉，但縱使拉票幾忙都好，佢每星期都會抽時間行山舒展吓筋骨。○三年曾經患癌並戰勝病魔嘅嫻姐，痊愈後聽從醫生建議多做運動，仲體會到行山嘅樂趣，原來大自然美景可以令佢暫時忘卻工作煩惱。

上星期六朝早約咗嫻姐去山頂香港仔水塘道行山，嗰條路嫻姐熟晒，佢話平時約埋幾位朋友行山有講有笑，三小時嘅路程話咁快行完。佢好感慨話，現代人生活違反規律，只有接觸花草樹木、鳥獸蟲魚，人類先至可以回歸真我喎。除咗行山外，佢每星期仲會做兩次健身。

近排政界最hit就係講特首選舉，嫻姐提醒想選嘅人，唔該快啲落區了解居民生活情況，事關好多政策唔係坐喺度做研究就可以搞得好，只有明白用家感受，政策先會奏效：「講咗好多年啦，點解啲人硬係做唔好呢？」

陳婉嫻將出選黃大仙龍上選區，同區仲有林偉基同任亮憲。