政壇：林大輝請林健鋒食檸檬

疑似特首候選人、政務司司長唐唐有兩大得力助手，一個係有份幫自己打江山嘅家臣林大輝，另一個就係工商界老友記林健鋒，兩人喺言語間都似乎對唐營嘅部署略有所知，但偏偏又水火不容。

有知情人士話，早前成立嘅工商專業聯盟，林健鋒本來想拉攏林大輝埋班，但係點知大輝即刻耍手兼擰頭，據聞連唐唐都冇佢符。林健鋒仲出晒口要求更有力人士幫手向大輝「娘家」廠商會嘅元老施壓，要求佢哋幫幫手拉線，但有力人士認為勉強冇幸福，所以都係留番啲自由度畀佢。

聽聞大輝唔加入工商專聯，有一個好冠冕堂皇嘅理由，就係佢同合作咗幾年嘅一班獨立建制派議員，即係五散人都唔打算加入任何政黨或者組織。

所以大輝就話自己唔加入工商專聯，先可以發揮到現時嘅角色，喺外圍幫手拉攏五散人，團結建制派嘅工商專業力量。

有知情人士話，大輝同林健鋒過去有乜仇怨，大家無乜聽聞，大輝請林健鋒食咗個大檸檬，其中一個原因係佢自視力好高，認為林健鋒次次都喺政府最後一刻先表態，立場唔清晰，咁樣搞法各有各做好過，所以打死都唔肯入去工商專聯。