政壇：長毛選觀龍預咗爆衝突
日前話會喺區議會選舉到荃灣挑戰新民黨副主席田北辰嘅社民連立法會議員「長毛」梁國雄，前晚突然宣布改去中西區觀龍選區，挑戰已經報名嘅建仔葉國謙。長毛尋日去到當區，唔使一陣已經蒐集到一堆提名，呢度話晒係敵方地頭，佢嗌咪時畀一個講唔純正廣東話嘅女性不停咁鬧，佢就笑言落呢區已經預咗有衝突。
長毛坦言自己屬空降，所以今次選舉如果同對手票數相差唔遠，佢都覺算係達到目的。佢透露今次選舉會集中話畀選民聽對方政黨過往嘅投票紀錄，等大家知道對手並唔係真心為市民。
另外，長毛尋日朝早去咗尖沙咀警署報警，投訴九月一日替補機制諮詢會當晚畀一個支持方案嘅阿伯襲擊，咁啱前日「維園阿哥」任亮憲喺黃大仙派單張亦畀阿伯襲擊。長毛批評呢啲先係真正暴力，而且件事好明顯同選舉有關。