政壇：殘舊公院爭重建 當梁栢賢係黃大仙

多間公立醫院已經殘舊不堪，好似聯合醫院、瑪麗醫院同廣華醫院咁，先後提交重建計劃，可惜政府一直歎慢板唔審批，導致施工無期。聯合醫院一班員工都知道要同其他醫院「拗手瓜」爭撥款唔容易，所以近日趁醫管局行政總裁PY梁栢賢參觀時，紛紛「攔路陳情」，希望管理層體恤病人插針都插唔入，盡速擴建，直頭當咗PY係黃大仙。

嘆政府無批撥款

PY上星期同幾位醫管局董事局成員去聯合醫院參觀，該院出名地方淺窄，創院三十八年都無擴建，門診部日日逼滿病人。據講PY一行人當日所到之處，都不斷聽到員工訴苦，皆因聯合去年中已向食物及衞生局提交擴建計劃，工程預算約七十億元，但當局一直無聲氣，令佢哋大失所望。

有聯合員工爆料，一眾董事局成員途經眼科門診時，見到病人「塞到冚」，連通道位都要做埋臨時診症室，都不禁話冇諗過嗰度地方咁細。該員工慨嘆，身體虛弱嘅癌症病人覆診時都唔夠位坐，要坐去隔籬嘅兒科門診；X光部又唔夠電腦，搞到班醫生日日都要鬥快霸機，先睇到病人啲X光片。PY當日出席員工論壇時，被多次問到究竟撐唔撐聯合擴建，佢話同聯合員工一樣咁肉緊，一定全力支持，但就無奈咁話要等政府拍板批錢先開得工。

其實，作為港大醫學院教學醫院嘅瑪麗醫院，亦成日畀一眾國手級教授批評設備殘舊，該院亦提交咗可行性研究報告，打算拆除七幢舊建築，興建新急症室同心臟中心；有百年歷史嘅廣華醫院就更加「溶溶爛爛」，外牆又滲水又有裂紋，食衞局○八年已批准重建，前期規劃亦做好晒，原定今年動工，又係到依家都未有撥款。間間醫院都爭先重建，PY嚟緊再去巡醫院，睇怕都會繼續被前線醫護近距離「發功」。