保育矯枉過正 因住官逼民反

港人會唔會倣效中東「茉莉花革命」，嚟個「紫荊花革命」？呢個問題答你唔到，不過咁，如果真係有紫荊花革命，爆發地點唔係本港，可能係好多新界原居民居住嘅歐洲。

話說港府計劃將五十四幅鄰近郊野公園用地納入規劃管制，新界原居民大鬧當局喺無賠償下將私人土地凍結，等同變相將私產充公，係「夾硬搶人哋啲嘢嚟保育」嘅「滅村行動」，令僑居海外嘅原居民日後無法落葉歸根，「有村歸不得」。

官逼民反，原居民決定發起連串反擊行動，除咗繼續同港府抗爭，亦計劃北上陳情，搵北大人主持公道，更唔排除發動僑居歐洲嘅原居民鄉親向駐當地嘅中國使館尋求協助，向港府施壓。嘩，「越洋上訪」都出埋，今鋪演變成「隔洋紫荊花革命」唔係冇可能o架！

發展局局長林鄭月娥仲死撐，指有關土地納入規管之後，業權人可申請再發展嘅空間會收窄，但唔等於港府攞走咗佢哋嘅發展權喎。咪住！發展空間收窄咗，即係發展權被削弱啦，咁同「攞」有乜分別呢？叮！

保育係眾人嘅事，人人有責，原居民不滿嘅唔係保育本身，而係當局做法太霸道，對佢哋嘅訴求無動於衷。老實講吖，要業權人獨力承擔保育責任，唔單止唔合理，更加係矯枉過正。

冇錯，保育係好事，弊在當局並冇配套政策，見步行步，拖得就拖，卸得就卸，最好乜都人哋做晒。其實，如果港府有心保育，辦法多多喇，例如直接買入土地，又或者倣效景賢里嘅做法以地換地咪得囉。

講開景賢里，就知道港府嘅保育政策幾咁戇居。當年景賢里被拆到爛溶溶，當局先至補鑊，仲一口氣將千幾棟建築物列為古蹟，成個「保育先鋒」咁款。問題係，建築物一被列為古蹟，就限制多多，商業價值大受影響，唔少業主直斥當局侵奪私產。保育變擾民，簡直匪夷所思，唉，冇計喇，夕陽政府倒數等收工，長遠規劃欠奉，經濟係咁，扶貧係咁，保育更加唔例外喇。

有新界原居民用「慘過做女嗰陣」，暗示回歸後港府表現仲衰過殖民地政府。計太一叮話齋，當年港英都識得「光榮撤退」，煲呔曾連份工都做到甩甩漏漏，拖泥帶水，睇怕未等到夠鐘就要棚尾拉箱都似，叮！