政壇：村民怒摑鄉局批鬥林鄭
政府早前又決定將五十四幅毗連郊野公園嘅土地納入分區規劃大綱圖，激到鄉民生蝦咁跳，今次反彈比上次僭建風暴更大。有鄉民不滿鄉議局處事過分軟弱，聲言自發組織大型抗爭行動，頭炮係計劃喺下月二十二日全體村代表大會上批鬥政府，矛頭直指發展局局長林鄭月娥。
可能林鄭聞到陣味，尋日話發展同保育要取得平衡，即使將五十四幅地納入分區規劃大綱圖，但如果發現土地範圍內有原居民村落，亦會預留「鄉村發展區」，畀原居民申請興建丁屋喎。不過，鄉議局執委林國昌話，即使規劃後有預留「鄉村發展區」，仍然要睇個區有幾大、起到幾多丁屋，一切都要傾過、睇過先至知。