政壇：搞搞政：大舊石葡國朝聖感恩
專業會議嘅立法會議員「大舊石」石禮謙係虔誠天主教徒，佢喺立會抖暑假期間嘅葡萄牙之旅，就喺聖母顯靈嘅花地瑪逗留兩日，感受吓聖地嘅靈氣。
喺澳門出生嘅佢去過花地瑪好多次，但佢坦言到當地唔係要祈求啲乜嘢，反而係要感謝造物主嘅眷顧。佢話係因為覺得自己嘅事業順利，女兒又聽教聽話，就算健康出問題，通咗幾次波仔後又再生龍活虎，咁嘅人生歷程都算蒙主恩澤喇。
佢仲話有好多身體抱恙或肢體殘障嘅人，步履蹣跚咁走去朝聖，相比佢冇穿冇爛，其實係好幸福㗎喇！佢隨即講咗個故事，話說有位小女孩喺朝聖之路中，不停埋怨爸爸唔肯買對新鞋，但當小女孩喺巴士上見到一位信徒係冇咗雙腳嘅時候，就覺悟到擁有健全嘅身軀係幾咁可貴。所以去朝聖令大舊石知足，會好珍惜身邊嘅一切喎！
